Նորություններ

Այսօր է ծնվել Լեոնիդ Ենգիբարյանը

Այսօր 20-րդ դարի կրկեսի նշանավոր արտիստ Լեոնիդ Ենգիբարյանի ծննդյան օրն է։ Նա ծնվել է 1935 թվականին Մոսկվայում։ Կես տարի սովորել է Ձկնային տնտեսության, ապա Մոսկվայի ֆիզիկական կուլտուրայի ինստիտուտում (զբաղվել է բռնցքամարտով, ստացել 1-ին կարգ):

Կրկեսային արվեստի պետական ուսումնարանի կլոունադայի բաժինն ավարտելուց հետո նա գալիս է Երևան և ընդունվում հայկական կրկեսախումբ։ 1956 թվականից նկարահանվել է կինոյում։

Կրկեսից բացի, Ենգիբարյանը հանդես է եկել էստրադայում «Մնջախաղի երեկոներով», գրել է արձակ ստեղծագործություններ։ Կինոյում նկարահանվել է այնպիսի վարպետների մոտ, ինչպիսիք են Սերգեյ Փարաջանովը («Մոռացված նախնիների ստվերները»), Ռոլան Բիկովը («Այբոլիտ-66») և այլ ֆիլմերում՝ «Մանեժում պատանեկությունն է»,  «Վառարան-նստարաններ»,  «Վզնոց իմ սիրելիի համար» և այլն։

Ենգիբարյանը ստեղծել է ողբերգական և կատակերգական տեսարաններ, բազմազան կերպարներ ու իրավիճակներ, կիրառել բարդ հնարքներ, որոնք ցուցադրել է նաև կրկեսում: Խոհափիլիսոփայական երանգ ունեն Ենգիբարյանի «Փողոցային ակրոբատ», «Քայլեր», «Ողջն ու մեռածը», «Բռնցքամարտ», «Սիրտը ափի մեջ», «Հովանոց» ստեղծագործությունները:

«Ես ոչինչ չեմ հասկանում: Մեծե՛ր, լսո՞ւմ եք, ես չեմ հասկանում ձեր կանոնները, ձեր բարոյականություն կոչվածը, ձեր սերը»:

«Նրանք, որոնց սիրում են, արտասովոր են դառնում»

«Նպատակս  և երջանկությունս սերտ կապված են, բայց ես չեմ հավատում երջանիկ ավարտին՝ ես հավատում եմ երջանիկ ընթացքին»