Նորություններ
Մայիսի 9-ը. հանուն հաղթանակի և խաղաղության
09.05.2022
Այսօր՝ մայիսի 9-ին, լրանում է Հայրենական մեծ պատերազմում տարած հաղթանակի 77-րդ տարեդարձը.տոն, որ խորհրդանշում է Երկրորդ աշխարհամարտի ավարտը, Ֆաշիզմի դեմ պայքարում բազմաթիվ ժողովուրդների հետ միասին նաև մեր հայրերի ու պապերի սխրանքով նվաճված պանծալի հաղթանակը:
Հայ ժողովուրդը Մեծ հայրենականում հերոսական մասնակցություն ցուցաբերեց. հաղթանակի ժառանգությունն այսօր ևս կարևոր արժեք է ապագա սերունդների համար:
Երկրորդ աշխարհամարտում մեր ժողովուրդը ցուցաբերեց միասնականություն, խիզախություն և տոկոնություն, որ յուրօրինակ ոգեշնչում դարձավ Արցախյան գոյամարտի տարիներին:
Մեր երկիրը վերահաս աղետներից փրկեցին, իրենց կյանքի գնով խաղաղ ու ստեղծագործ ապագա կառուցելու հնարավորություն տվեցին նաև մի խումբ աբովյանականներ:
Տասնամյակներ շարունակ մայիսի 9-ը հայ ժողովրդի համար եղել է եռատոն. մեծ խանդավառությամբ նշվել է նաև Շուշիի ազատագրման և Արցախի պաշտպանության բանակի ստեղծման տարեդարձը:
44-օրյա պատերազմից հետո էլ՝ վստահ ենք, որ հայ ժողովուրդը, շարունակելով իր պատմական երթը, սերնդեսերունդ փոխանցելու է հպարտության զգացումը՝ հիշեցնելով, որ մեր հաղթանակներն ու ձեռքբերումները հնարավոր է կերտել համազգային միասնականությամբ:
Փա՛ռք մեր հերոսներին: Նրանց սխրանքը մենք հավերժացնելու ենք ամուր պետություն կառուցելով, իսկ պետականության գաղափարի արժևորման գործում մեծ անելիք ու դերակատարում ունի հատկապես Մանկավարժական համալսարանը:
Տեղեկատվությունը՝ www.aspu.am-ի
