Նորություններ

«Պարում է Հայֆիլմը»․․․․

Ալ․ Սպենդիարյանի անվան օպերայի և բալետի ազգային ակադեմիական թատրոնում կայացավ ՀՊՄՀ Կուլտուրայի ֆակուլտետի Պարարվեստի բաժնի 4-րդ կուրսի պետական ավարտական քննություն-համերգը։

«Խաթաբալա», «Կտոր մը երկինք», «Առաջին սիրո երգը», «Սողոմոնի երգեր», «Մայրիկ», «Զանգեզուր», «Սայաթ Նովա» և այլ ֆիլմերի համանուն պարային բեմադրություններ՝  նորին մեծություն պարի լեզվով․ «Պարում է Հայֆիլմը» խորեոգրաֆիկ ներկայացումը նվիրված էր հայ կինոյի հիմնադրման 100-ամյակին։

Յուրքանչյուր ուսումնական տարեվերջ նշանավորվում է «Պարարվեստ» բաժնի ավարտական կուրսի ուսանող-շրջանավարտների  հիշարժան խորեոգրաֆիկ ներկայացումներով․ մշակութային իրադարձություն, որն  արժանանում է ավարտական քննական հանձնաժողովի և հանդիսատեսի բարձր գնահատականին։

Դոցենտ  Վերա Ավետիսյանի և  դասախոս Տաթևիկ Սիմոնյանի անմնացորդ նվիրումի, հսկայածավալ աշխատանքի և մասնագիտական ղեկավարման արդյունքում՝ ուսանողների կատարմամբ ներկայացվեցին պարային ստեղծագործություններ, ցուցադրելով անհատական և խմբային կատարողականության պրոֆեսիոնալ մակարդակ, որին  նրանք հասել են ուսումնառության 4 տարիների ընթացքում։

«Ասում են՝ ցանկացած պետության անվտանգության երաշխավորը այդ երկրի բանիմաց և կիրթ ուսանողն է։ Այդ համատեքստում ավելացնում եմ, որ մեր պետության անվտանգության և ինքնության երաշխավորը նաև պարուսույց-մանկավարժն է, որը հայկական պարարվեստի ողջ զինանոցով մտնելու է տարբեր կրթօջախներ, իր գիտելիքները, հմտություններն ու կարողություններն է փոխանցելու սերունդներին, սաներին՝  պահելով մեր ազգային մշակույթն ու  նրանց փոխանցելով հայի ինքնությունը»,- նշեց Պարարվեստի մանկավարժության ամբիոնի վարիչ Կարեն Գևորգյանն ու խոստովանեց՝ ամեն տարի հուզվում է․ կարծես՝ ինքն է ավարտում։

Պրոֆեսոր Գևորգյանը կարծում է, որ  հայ կինոյի հիմնադրման 100-ամյակին նվիրված առավել  ոգեղեն, մշակութային ու ազգային իրադարձություն դժվար թե լինի։

Իրեն մնում է երախտիքի, գնահատանքի, մեծարանքի, փառաբանության խոսքն ասել ուսանողներին, որոնց բոլորին գերազանց է գնահատել։

Կարեն Գևորգյանը բուհի ղեկավարի անունից շնորհավորեց 2022-2023 ուսումնական տարվա շրջանավարտներին՝  մաղթելով մշակութային խիզախումներ՝ հանուն հայ մշակույթի և հայ մանկավարժության։