Նորություններ

Երևանում սեպտեմբերի 8-ից  կմեկնարկի Հայաստանում կերպարվեստի բնագավառում իր ծավալով և տարածաշրջանում միակ «Գեղարվեստական տպագրության չորրորդ միջազգային բիենալե, Երևան 2023»-ը:

Բիենալեի շրջանակում աշխարհի 53 երկրի 231 փորագրանկարչի 355 գեղարվեստական տպագրության բազմատեսակ տեխնիկաներով ու ոճերով կատարված աշխատանքները կներկայացվեն  մեկ հարթակում:

Փառատոնի նախնական փուլին ներկայացվել են 1500 աշխատանքներ, ինչը խոսում է փառատոնի միջազգային կայացման, ճանաչման և միջազգային հանրության կողմից այն կարևորելու մասին:

Բիենալեի շրջանակում 2023 թվականի սեպտեմբերի 12-17-ը Հայաստանում և տարածաշրջանում առաջին անգամ կանցկացվի «Հայաստանը` տարածաշրջանում Գեղարվեստական տպագրության կենտրոն» միջազգային համաժողովը, որին ներկա են գտնվելու և կրթական բաղադրիչի գերակայությունը և անհրաժեշտությունը ապահովելու են 30 երկրից փորագրանկարչության ավելի քան 50 փորձագետ։

«Գեղարվեստական տպագրության չորրորդ միջազգային բիենալե, Երևան 2023»-ի բացման հանդիսավոր արարողությունը տեղի է ունենալու 2023թ.-ի սեպտեմբերի 8-ին ժամը 19:00-ին «Ազնավուր» կենտրոնում:

Մրցանակաբաշխության հանդիսավոր արարողությունը կայանալու է 2023թ.-ի սեպտեմբերի 11-ին ժամը 19:00-ին  «Ազնավուր» կենտրոնում: Բիենալեն տևելու է մինչև նոյեմբերի 8-ը, մուտքն անվճար է: