Նորություններ
Հանդիպում ուսանողների հետ
16.11.2023
Մանկավարժական համալսարանում կազմակերպվել էր հանդիպում ուսանողների հետ։ Ուսանողական խորհրդի նախաձեռնությանը ներկա էին նաև Արցախից բռնի տեղահանված և աբովյանականների շարքերը համալրած ուսանողները։
«Ես հաղթանակած սերնդի ներկայացուցիչ եմ, այնինչ վերջին դեպքերը ստիպեցին բոլորիս դժվար ճանապարհ անցնել։ Նման իրողությունները ստիպում են ևս մեկ անգամ ուսումնասիրել պատմությունը, դասեր քաղել դրանից, չհուսահատվել և չտխրել։ Վստահ եմ՝ միասին այնքան ուժեղ կլինենք, որ կկարողանանք հաղթահարել դժվարությունները՝ կերտելով բոլորիս համար բաղձալի ապագա»,- ողջունելով ուսանողներին ՝ իր խոսքում նշեց ՀՊՄՀ Աշխատակազմի և միջազգային համագործակցության գծով պրոռեկտոր Մարիաննա Հարությունյանը։
Նա ընդգծում է՝ ընտրել են ամենակարևոր մասնագիտությունը և կստանան բավարար գիտելքիներ, ձեռք կբերեն կարողություններ ու հմտություններ, կդառնան որակյալ մասնագետներ՝ դաստիարակելով ապագայի և հայրենիքի համար արժանի սերունդ։
ՀՊՄՀ Ուսանողական խորհրդի նախագահ Պարույր Գալստյանը վստահեցնում է՝ ուսանողական կառույցն արդեն 30 տարի ուսանողի կողքին է․ արտահայտում և պաշտպանում է ուսանողության շահերը, քննարկում ուսանողների խնդիրները, դիմումներն ու առաջարկները՝ ներկայացնելով ՀՊՄՀ ղեկավար կազմին։
Պարույր Գալստյանը նկատում է՝ մեկ հանդիպման ընթացքում դժվար է ծանոթացնել 100-ամյա բուհը, սակայն պատրաստ են ներկայացնել մանկավարժական դարբնոցը, որի կենտրոնում եղել և մնում է ուսանողը։
Ուսանողները ծանոթացան բուհի կառուցվածքին, միջազգային կապերին, պաշտոնական լրատվամիջոցներին։ Ուսանողական խորհրդի նախագահը ներկայացրեց նաև սոցիալական, ինտելեկտուալ և ուսանողական ծրագրերը։ Վստահեցրեց՝ դրանք ստեղծման օրից լայն հնարավորություն են ընձեռում ուսանողին․ կրթական բաղադրիչից զատ, նաև ժամանցային են։
«Լավագույն ուսանող», Ամառային դպրոց», «Ձմեռային հանգիստ»․ Պարույր Գալստյանը թվարկեց այս և այլ ծրագրերն ու տեղեկացրեց, որ իրենց ձևաչափով բուհերի շրջանում տարբերվող ծրագրերին կարող են մասնակցել բարձր առաջադիմությամբ, ակտիվությամբ աչքի ընկնող բոլոր ուսանողները։
Նա հույս հայտնեց, որ հանդիպումը տեղեկատվական առումով արդյունավետ էր և հորդորեց ուսանողներին հնարավորինս ակտիվ լինել և ներգրավվել տարատեսակ ծրագրերում։
Տեղեկատվությունը՝ ՀՊՄՀ պաշտոնական կայքի
